Լիլիթ քույր

Պատգամ 18.01.2021թ.

-Զավակս, առավել քան երբևէ, հիմա շատ աղոթեք գալիք փորձության համար: Եթե իմանայիք ձեր ապագան ոչ մեկդ ծնկած տեղից չէիք վեր կանգնի:

Շարունակ Իմ` Հիսուսի անունը կանչեք:

Լիլիթ քույր

Պատգամ 16.11.2020թ.

Դուստրս, Ես՝ Հիսուսս շարունակում եմ քեզ սիրել, հավատա, դուք ապրում եք շատ ավելի ծանր ժամանակներ, քան պատկերացնում եք: Ձեր ժամանակների համար շատ սրբեր աղոթել են, որ դուք՝ քրիստոնյաներդ ուժ ունենաք տանելու այս փորձությունները:

Հիմա լսեք, թե ինչ է ասում ձեզ Հոգին.

1. Սրբվե´ք մեղքերից (ծածուկ), ազատվեք դրանցից, ինչպես կրակի կայծից:

2. Մի´ դատեք ոչ ոքի, տառացիորեն ոչ ոքի:

3. Շատ լուռ մնացեք:

4. Քննարկումների մի մասնակցեք, եթե դրանք հոգևոր չեն: Զգույշ եղեք. անգամ ձեզ կթվա, թե հոգևոր մարդկանցով զրուցում եք, բայց կարող է Սուրբ Հոգուց չլինել ձեր խոսքն ու զրույցը:

5. Սկսեք ձեր և ձեր ընտանիքներից. հիշե´ք դատաստանը սկսելու եմ Իմ տնից:

6. Աղոթեք քրիստոնյաների արթնության համար, Սատանան նիրհ է իջեցրել հստակ Իմ զավակների վրա:

Իմացե´ք, դուք մենակ չեք պայքարում այսօրվա դևերի դեմ. համայն Սրբերը, Հաղթանակած Եկեղեցին ձեզ հետ է, նրանց բարեխոսությամբ և հատուկ սբ. Տիրամոր բարեխոսությամբ աղոթեք:

Ի´մ զավակներ, աղոթե´ք, որ աղոթել սովորեք:

Պատգամը տրվել է Լիլիթ քրոջ միջոցով 14.06.2020թ.

Դուստրս, աղոթեք ձեր երկրի համար, քանի որ այն կործանվում է: Ինչպես հիմա անօրենության որդիներն են ոտքի ելել անօրենություն պահանջելով, այնպես էլ դուք՝ Լույսի որդիներդ, աղոթքով միաբանվեք արդարության համար:

Պատգամը տրվել է Լիլիթ քրոջ միջոցով 30.03.2020

-Իմ զավակներ. Ես` Հիսուսս, ձեզ սիրում եմ և չեմ լքել ձեզ, հավատացե՛ք, Իմ Խոսքն է կատարվում ամբողջ աշխարհում: Իմ Գալուստը մոտ է, հավատացե՛ք, ձեզ` բոլորիդ առիթ է տրվել ընտանիքով միաբանվել աղոթելու, Սուրբ Գիրք կարդալու և ձեր ապրածի մասին խորհրդակցելու համար, բայց դուք` շատ-շատերդ տրտնջում եք նորից, ինչպես Իսրայելն էր տրտնջում, երբ անապատի մեջ Ես նրանց առանձնացրել էի: Զավակներս, հիշեք, ոչ-ոք չի արդարանալու, որ ժամանակ չուներ աղոթելու, Սուրբ Գիրք կարդալու և իր մեղքերի համար ապաշխարելու. աղոթե՛ք, անդադա՛ր աղոթեք, անգամ, եթե գործ եք անում: Կանչեք Իմ` Հիսուսիս անունը. չե՞ք հիշում, որ ասվեց. «Ով Տիրոջ Անունը կանչի, պետք է ապրի»: Նաև հիշե՛ք պղնձե օձը` փրկությունը Աստծուց է. դուք կենտրոնացեք ձեր հոգևոր հաշվետվության վրա և միայն Ինձ` Հիսուսիս նայեք. Պղնձե Օձին նայողներն էին փրկվում և ոչ թե նրանք, որ աջ ու ձախ էին փրկություն փնտրում:

Ես` Հիսուսս ձեր մեջ եմ, մի՛ մոռացեք

Պատգամը տրվել է Լիլիթ քրոջ միջոցով 25.09.2019

Զավա՛կս, օրհասական է ձեր երկրի վիճակը: Ես` Հիսուսս կոչ եմ անում ձեզ միաբանվելու և վերականգնելու մեկժամյա աղոթքները:

Հաղթանակած Եկեղեցին պատրաստ է ձեզ աջակցելու: Խնդրե՛ք նրանց բարեխոսությունը:

Օրհնում եմ ձեզ, Իմ անդրանիկ ժողովուրդ:

Պատգամ` 31.05.2019 թ.

Դուստրս, Ես` Հիսուսս սիրում եմ քեզ, զավակս, Իմ Սուրբ Սիրտը շարունակ տխրում է նայելով ձեր ազգին. դուք նմանվում եք Իսրայելին, երբ գերությունից դուրս գալով անընդհատ ետ էր նայում ասելով, որ նախկինում ավելի լավ էր: Գիտե՞ս ամենաշատը սիրտս ցավում է, երբ այդ ասողները իրենց քրիստոնյա են անվանում. մի՞թե հրաշք չէր, որ կատարվեց ձեր երկրում: Դա Իմ` Հիսուսիս զորությունն էր, որ լսեցի ձեր ազգից եկող շարունակ թախանձագին աղաղակները, բայց հիմա ձեր ազգը հեթանոսի պես է պահում իրեն` շարունակ տրտնջալով, թե ոչինչ էլ չի փոփոխվում. փոփոխությունը ձեր սրտերում պետք է լինի, ձեր ընտանիքներում:

Սթափվեք զավակներս, դուրս մի նայեք, ամեն մեկդ թող իր մեջ նայի. Ես` Հիսուսս ձեզ ուժ կտամ մաքրվելու շարունակական կրկնվող մեղքերից, որոնք ավերում են ձեր հոգևոր կյանքը:

Ախր չեմ ցանկանում ձեր կորուստը, մի՞թե քիչ էր խաչելիության տանջանքները. հիմա ինչո՞ւ եք տանջում ինձ ձեր մեղքերով. չէ՞ որ չկա մեկը, որ ձեզ սիրի Ինձ նման:

Օրհնում եմ ձեզ Իմ Զավակներ:

Փոխանցեց Լիլիթը